Ayaq ağrısı bu təhlükəli xəstəliyin əlaməti ola bilər

Gəzinti zamanı ayaqlarda yaranan ağrı, qıcolma və yorğunluq damar xəstəliyinin əlaməti ola bilər.

Kanadanın MakGill Universitetinin alimləri “The Conversation”a açıqlamalarında bu barədə xəbərdarlıq ediblər.

Mütəxəssislərin sözlərinə görə, söhbət periferik arteriya xəstəliyindən gedə bilər. Bu zaman ayaqlara qan aparan damarlar daralır və ya tutulur. Xəstəlik arteriyaların daxilində aterosklerotik lövhələrin yığılması nəticəsində yaranır və infarkt, eləcə də bəzi insult növlərinə səbəb olan proseslə əlaqəlidir. Buna görə də ayaqlardakı ağrı yalnız ətraflarla bağlı yerli problemin deyil, ürək-damar xəstəlikləri riskinin artmasının da göstəricisi ola bilər.

Periferik arteriya xəstəliyinin əsas əlamətləri gəzinti zamanı ayaq əzələlərində ağrı, sızıltı, qıcolma və yorğunluq hissidir. Bu şikayətlər adətən insan dayandıqda və istirahət etdikdə keçir. Bununla belə, xəstəliyin əlamətləri fərqli ola və ya ümumiyyətlə müşahidə edilməyə bilər. Bu halla üzləşən insan sadəcə daha az gəzməyə, pilləkənlərdən istifadə etməməyə başlaya və vəziyyətinin pisləşməsini yaşlanma və ya artritlə əlaqələndirə bilər.

Alimlər xüsusilə siqaret çəkənlərdə və şəkərli diabetdən əziyyət çəkən insanlarda bu xəstəliyin yaranma riskinin yüksək olduğunu bildiriblər.

Xəstəliyin aşkarlanmasının sadə üsullarından biri topuq-bazu indeksinin (ABİ) ölçülməsidir. Bu müayinə zamanı topuq və qoldakı arterial təzyiq müqayisə edilir. Ayaqdakı təzyiqin əhəmiyyətli dərəcədə aşağı olması damarların daralmasına işarə edə bilər.

Həkimlər gəzinti zamanı ayaqlarda yaranan ağrını avtomatik olaraq yaşlanma ilə əlaqələndirməməyi tövsiyə edirlər. Təkrarlanan simptomlar zamanı tibbi müayinədən keçmək vacibdir. Çünki qan təchizatının ciddi şəkildə pozulması amputasiya da daxil olmaqla ağır fəsadlara səbəb ola bilər.