İngilis jurnalistdən ŞOK İDDİA - Britaniyanın müharibədə bir günlük hərbi sursatı var

"Genişmiqyaslı silahlı münaqişə baş verərsə, Britaniya silahlı qüvvələrinin yalnız bir neçə günə kifayət edəcək qədər sursatı olacaq".

Planetinfo.az xəbər verir ki, bu fikirlər ingilis jurnalist Martin İvensin Bloomberg-də dərc olunmuş məqaləsində yazılır.

Məqalənin müəllifi qeyd edib ki, 30 il əvvəl Britaniya Ordusu beş diviziya yerləşdirə bilərdi, bu gün isə 70 min nəfərlik ehtiyatdan yalnız birini toplaya bilir.

Onun qiymətləndirməsinə görə, son dörddə bir əsrdə Britaniya hökumətləri davamlı müdafiə xərclərinin azaldılması səbəbindən krallığın sərt gücünün çökməsinə icazə veriblər. Berlin divarının yıxılması zamanı 50 freqat və esmineslə müqayisədə Kral Donanması cəmi on iki döyüş gəmisi yerləşdirə bilir. Eyni dövrdə Kral Hərbi Hava Qüvvələrinin eskadrilyalarının sayı 36-dan 6-ya düşüb.

Jurnalist vurğulayıb ki, böhran İranla münaqişə fonunda Britaniya siyasətçiləri və hərbi liderləri arasında fikir ayrılıqlarını üzə çıxarıb. ABŞ-İsrail hücumlarının başlamasından və İranın Kiprdəki Britaniya Akrotiri bazasına dron hücumundan sonra Kral Dəniz Qüvvələrinin bir dənə də olsun gəmisi keçmiş müstəmləkəni müdafiə etmək üçün ərazi sularını tərk etməyib. Britaniya esminesi HMS Dragon Aralıq dənizinə yalnız çərşənbə axşamı, hərbi əməliyyatların başlamasından təxminən 10 gün sonra yola düşüb. HMS Prince of Wales təyyarədaşıyan gəmisinin Fars körfəzinə yerləşdirilməsi də özəl podratçılarla bağlı problemlərə görə təxirə salınıb.

İvens xatırladıb ki, Baş nazir Keyr Starmerin Amerika bombardmançı təyyarələrinin Britaniya bazalarından qalxmasına icazə verməkdən imtina etməsindən sonra Ağ Evlə söz müharibəsi qaçılmaz olub.

Bundan əlavə, Britaniya hökuməti vəd etdiyi müdafiə investisiya planının qəbulunu təxirə salıb, çünki Xəzinədarlıq vəsaitlərin sui-istifadə olunacağından qorxur. Eyni zamanda Starmer müdafiə büdcəsini yalnız 2030-cu ildə ÜDM-in 2,4%-dən 3%-ə qədər artırmağı vəd edib və mövcud vəsaitləri sosial təminata yönəltməyi üstün tutub.