Paltar yuyarkən yol verilən 5 SƏHV - "Yumruq qaydası" nədir?

Geyimlərinizin ömrünü uzatmaq və enerji xərclərinə qənaət etmək üçün paltaryuyan maşından istifadə edərkən aşağıdakı 5 geniş yayılmış səhvə yol verməməyiniz tövsiyə olunur.

Bu barədə İtaliyanın "İl Giornale" nəşri yazıb.

1. Həddindən çox yuyucu vasitə istifadə etmək

Daha çox yuyucu vasitə paltarların daha təmiz olması demək deyil. Artıq qalan vasitələr parçanın liflərində yığılaraq onu sərtləşdirir və dəridə qıcıqlanmaya səbəb ola bilər. Bundan başqa, bu, maşının tıxanmasına və xoşagəlməz qoxuların yaranmasına yol açır.

2. Hər şeyi 40°C-də yumaq

Bu temperatur bir çox geyim üçün lazımsız dərəcədə yüksəkdir. 40°C-də rənglər tez solur və parçanın lifləri zəifləyir. Cins şalvarlar, köynəklər və sviterlər üçün 30°C kifayətdir. Xatırladaq ki, paltaryuyanın sərf etdiyi enerjinin 90%-i suyu qızdırmağa gedir, buna görə də soyuq suda yumaq həm büdcənizi qoruyur, həm də parçanı zədələnməkdən xilas edir.

3. Barabanı ağzınacan doldurmaq

Paltarların yaxşı yuyulması üçün onların baraban daxilində hərəkət etməyə yerə ehtiyacı var. Əgər baraban çox doludursa, yuyucu vasitə tam durulanmır və paltarlar bir-birinə çox sürtünür. Mütəxəssislər "yumruq qaydası"ndan istifadə etməyi məsləhət görür: paltarların üzəri ilə barabanın yuxarı kənarı arasında bir yumruq boyda boşluq saxlayın.

4. Ləkəli paltarları birbaşa maşına atmaq

Şərab, qəhvə, yemək və ya ot ləkələrini əvvəlcədən təmizləmədən maşına atdıqda, suyun istiliyi ləkəni parçaya daha da hopdurur. Ləkəli hissəni öncədən isladın, ləkəçıxarıcı vasitəni tətbiq edib 10 dəqiqə gözləyin, daha sonra maşında yuyun.

5. Paltaryuyan maşını təmizləməmək

Maşının rezinlərində yığılan kif, barabandakı ərp və yuyucu vasitə qalıqları paltarlarınıza pis qoxu keçirə bilər. Ayda bir dəfə maşını paltarsız, 60°C temperaturda işə salmaq lazımdır. Həmçinin, hər yuyulmadan sonra barabanın quruması üçün maşının qapısını açıq saxlayın.

Ekoloji seçim:

Daha dayanıqlı yuma prosesi üçün ekoloji təmiz, təbii sabunlardan istifadə etmək və ya müasir həll olan yuyucu vərəqlərə (Natulium, R5, Clean Clothes, Essentia, Everdrop) üstünlük vermək olar. Parçanı yumşaltmaq üçün isə kimyəvi yumşaldıcılar əvəzinə limon turşusu məhlulundan istifadə etmək ən təbii və ekoloji seçimdir.