Keçmiş və yeni baş nazir - Hansı daha varlıdır?

Macarıstanın hazırkı Baş naziri Peter Madyarın sələfi Viktor Orbandan xeyli varlı olduğu məlum olub.

Bu nəticə hər iki şəxsin milli parlamentin saytında dərc olunan 2025-ci il üçün gəlir bəyannamələrində qeyd olunub.

Rəsmi məlumatlara görə, Orbanın bank hesablarında təxminən 25,6 min avro var. O, həyat yoldaşı ilə birlikdə Budapeştdə evə və doğulduğu Felçut qəsəbəsində daşınmaz əmlaka sahibdir. Sənədlərdə səhm və ya digər qiymətli kağızlar göstərilməyib, həmçinin onun borcu yoxdur. Seçkilərdə məğlub olduqdan sonra o, 100 min avro məbləğindəki təzminatını Zakarpatyada yerləşən uşaq evinə bağışlayıb.

Eyni zamanda, Madyar ümumi məbləği 197 min avro olan qiymətli kağızlar bəyan edib, üstəlik, 14 min avro nağd pulu var. Sənədlərdən məlum olub ki, onun Budapeştdə evi, 49 kvadratmetrlik mənzili, Balaton gölü yaxınlığında torpaq sahəsi, "Volvo XC60" avtomobili, "Yamaha" pianinosu və iki rəsm əsəri var. Yeni Baş nazirin 60 min avro məbləğində krediti mövcuddur.

Aprelin 13-də Macarıstanda birpalatalı parlamentə seçkilər başa çatıb. Nəticədə müxalifətçi "Tisa" partiyası böyük səs çoxluğu ilə qələbə qazanıb. Peter Madyarın siyasi qüvvəsi parlamentdə konstitusiya çoxluğu əldə edib ki, bu da ona digər fraksiyaların dəstəyi olmadan qanunlar qəbul etməyə imkan verir.